Lizher digor da Brezidant Kuzul Sevenadurel Breizh

Aotrou Prezidant,

Kas a reomp deoc'h hon gourc'hemennoù war-lerc'h hoc'h anvidigezh e penn ar C'huzul Sevenadurel nevez.

Kalz a labour a vo d'ober evit hon yezh, pa weler emañ kuzul Pleuzal, e Treger, o paouez nac'h digoridigezh ur c'hlas divyezhek.

Kavout a ra deomp e vank e Breizh ur bern binvioù evit reiñ yec'hed d'hon yezh, ha soñjal a ra dimp n'hallomp ket tremen ken hep ur skingomz vrezhonek vroadel e Breizh, 32 vloaz war-lerc'h krouidigezh Radio Cymru, e Kembre e 1977.

Skingomzoù zo dija hag a skign brezhoneg marteze, met ne vezont ket klevet nemet e kornioù zo : e kêrioù evel Naoned ha Roazhon, ma vez kalz a dud o komz hag o teskiñ ar yezh ne glever skingomz brezhoneg ebet, hag e Brest eo peuzdibosubl. Ouzhpenn-se n'eo ket brezhoneg a vez klevet a-hed an deiz gant an holl skingomzoù-se, rak darn zo hanter e galleg, lod a skign kalz a sonerezh pe kanaouennoù saoznek dreist-holl, ha ne skignont ket keleier eus Breizh penn da benn, hag eus ar bed nebeutoc'h c'hoazh.

Ezhomm hon eus ur chadenn skingomz peogwir omp brezhonegerien, hag e tlejemp klevout hon yezh n'eus forzh pegoulz ha pelec'h e Breizh, evel ma c'hallomp klevout galleg ha saozneg n'eus forzh pelec'h e Breizh, evel ma vez klevet kembraeg n'eus forzh pelec'h e Kembre, peogwir e verit hon yezh kaout ar binvioù he deus ezhomm da vevañ, a wel d'an holl, ha n'eo kuzhet e korn pe gorn eus ar Genrouedad peogwir eo ur benveg dispar evit sikour ar re a zo o teskiñ ar yezh, peogwir n'haller ket c'hoantaat deskiñ ur yezh ha ne glever ket, hag ivez evit reiñ brud d'ar yezh, evit reiñ kalon ha sikour d'an deskerien, evit klevout ha deskiñ brezhoneg yac'h, evit klevout keleier e brezhoneg, pa n'eus kazetenn ebet na skinwel ebet evit klevout kanaouennoù brezhonek, rak ur yezh ha ne ganer ket enni zo tost da vervel, evit klevout kanaouennoù brezhonek savet gant tud yaouank, rak hep skingomz n'eus ket a ganerien, ha hep kanerien yaouank n'eus ket a yaouankizoù brezhonek, evit broudañ ar c'hrouiñ hag ar grouerien, kanerien ha sonerien Breizh ha ne vezont ket klevet er skingomzoù gallek evit stummañ kazetennerien vrezhonek ha tud yaouank evit micherioù ar c'hleweled, evit reiñ labour e brezhoneg d'ar vrezhonegerien, ha labour frouezhusoc'h evit ar yezh e Breizh penn-da-benn eget labour burev e kevredigezhioù lec'hel.

Prestik e vo dilennet ar C'huzulioù Rannvro nevez, ha dont a ray mare ar promesaoù adarre, marteze ar memes re evel pevar bloaz zo. Trawalc'h gant ar promesaoù toull-didoull, pe ar studiennoù chomet da louediñ en tiretennoù. Ur skingomz vrezhonek zo ezhomm an abretañ ar gwellañ. Hon yezh a dalvez ar boan reiñ dezhi an tu da vevañ gwelloc'h e 2010.

Mark Kerrain kelenner brezhoneg prezidant Sav-Heol

• Décès de Soïg Sibéril : la musique bretonne perd un virtuose de la guitare par Philippe Argouarch et chatGPT le 06/04/2025
• Invitation à la signature débat autour de l'histoire de la centralisation française par Paris Breton le 03/04/2025
• Dépêche ABP : Le Festival Interceltique de Lorient renforce la présence de la langue bretonne dans son application mobile par Philippe Argouarch et chatGPT le 03/04/2025
• Rendez-vous de Max avec Gilles Fortier par Spered Gouez / L'esprit sauvage le 02/04/2025
• Et si les milliardaires bretons soutenaient Diwan ? par La rédaction le 01/04/2025
• S.A.S. le Prince Albert II de Monaco en Bretagne : la célébration d’un héritage tricentenaire par LGM éditions le 01/04/2025
• Achu eo miz ar brezhoneg… Mes ober gant ar yezh, n'eo ket ! par BREZHOWEB le 01/04/2025
• Comme les champignons, certaines micro-algues sont venimeuses par Philippe Argouarch et chatGPT le 30/03/2025
• Le Chant des îles à l'honneur du Festival à Ouessant par Culture, arts et lettres des îles le 29/03/2025
• Comment faire vivre son breton ? par Eric Pianezza Le Page le 28/03/2025