S'accréditer |
S'abonner |
Se connecter |
Faire un donS'accréditer |
S'abonner |
Se connecter |
Faire un don
Prizioù Frañs 3 : War ar Renk emañ......
D'an 29 a viz Genver e vo roet Prizioù Frañs 3 e Landreger. Ur wech kentañ eo bet bodet ar varnerien dija, a-benn dibab an oberennoù da lakaat war ar renk. Skignet e vo an abadenn d'an antronoz vintin war Frañs 3 ha France Bleu Breizh Izel.
C'Hwec'h rummad a vo priziet er bloaz-mañ, ha teir oberenn war ar renk e-barzh pep hini.
Gwellañ romant faltazi : Ar Marc'h Glas (Riwal Huon - Al Liamm), Ar Gitar Tredan (J.-E. Mouton - An Alarc'h) ha Kan ar Mein (Mich Beyer - An Alarc'h).
Gwellañ pladenn vrezhonek : Ar Vro didu gant Oktopus Kafe, Disadorn Noz Fever gant Alambig Elektrik ha Just in Case gant Roy Eales.
Gwellañ oberenn gleweled : Youenn Gwernig (J.-C. Huitorel - Aligal/France Télévisions), Pennoù Pentur (Mikael Baudu - Gwengolo/Dizale), Istorioù Breizh (Luc David - Pois Chiche Films/France Télévisions).
Gwellañ intrudu evit ar yaouankiz : Ar Roue Marc'h (TES), Kevredad ar Gouren hag e gentelioù evit ar vugale, an DVD kontadennoù Ur wech e oa embannet gant Keit Vimp Bev.
Priz spered ar yezh : Jean-Claude ar Ruyet evit e dezenn Kelenn ar brezhoneg, komz, liamm ha norm, kinniget e stumm peder reolenn-sannañ evit brezhoneg ar skolioù, Ti ar vro Lesneven evit al levr Kanit ta tudoù, Ronan ar C'hoadig evit e levr Brezhoneg bro Gouelo (An Alarc'h).
Brezhoneger ar bloaz : Gouel broadel ar brezhoneg adlañset e miz Mae 2010, ar c'hentañ levrioù niverel e brezhoneg embannet gant Emgleo Breiz : Buhez prevez Lola P. ha Le trésor du breton parlé, Teatr Piba evit e bezh c'hoari Eden Bouillabes.
Kinniget e vo an abadenn gant Goulwena an Henaff ha Clément Soubigou.
DISPRIZIOÙ : PINIJENN A VO TRO D'OBER !
Un emgav reoliek ha gortozet eo deuet an darvoud da vezañ. Evel bep bloaz eo deuet poent da reiñ Disprizioù ar brezhoneg d'ar re zo dellezek d'o resev. Ar pezh a vo graet d'al Lun 20 da noz, en abadenn Webnoz skignet war-eeun eus iliz ar Folgoad, e-kichen Lesneven, adalek 8e30 noz.
D'ar strollad Allah's Kanañ e vo gouestlet abadenn Webnoz miz Kerzu, ha dalc'het e-kreiz iliz vrav ar Folgoad. Un abadenn a feiz penn-da-benn enta ? N'eo ket ken sur. Fent a vo evel-just, dreist-holl d'ar mare da reiñ Disprizioù ar bloaz 2010 d'ar re en devo soñjet ar juri n'o deus ket graet trawalc'h evit ar yezh. Pe da vihanañ, nebeutoc'h eget na c'hellent. « Siwazh, bep bloaz e vez kavet ar memes aozadurioù pe doare tud da loreañ, well-wazh. Un druez. Setu perak hon eus divizet cheñch tu d'hon oferenn er bloaz-mañ » a embann Lionel Buannic, rener Brezhoweb a vez roet lusk da Webnoz gantañ. « Ha pa vo aozet an abadenn en un iliz eo bet aes kavout ur stumm nevez : renket eo bet ar re a vo war ar renk e-barzh seizh rummad, evel ar seizh Pec'hed Kapital : an Ourgouilh, al Leziregezh, al Lontegezh, an Hudur, ar Bizhoni, ar Gounnar hag ar Warizi. » Marteze e ouio ar juri kaout truez a-walc'h da zigastizañ unan eus ar seizh pec'her avat, piv 'oar...
Anvioù zo bet lakaet e pep rummad dija. Diskuliet e vint e-kerzh an abadenn.
Fellout a ra da Lionel Buannic degas da soñj an holl, arvesterien pe loreidi, « ez eus kaoz da lakaat war-wel ar pezh ne ya ket war-raok e-keñver ar brezhoneg, ha n'eo ket tagañ tud war o anv ».
War un ton skañv ha farsus e vez kinniget an traoù-se bepred, « met n'eo ket evit kelo-se n'eo ket sirius ar gudenn ! »
A-benn sikour ar juri e c'hell an neb a garo kinnig darvoudoù pe aozadurioù da renkañ dindan pep « pec'hed », war brezhoweb.com.
Vidéos
Newsletters
Flux RSS - français
ABP sur Facebook
ABP sur X
Chaîne Youtube ABP